شاید وہ بھولی بسری نہ ہو آرزو کوئی
کچھ اور بھی کمی سی ہے تیری کمی کے ساتھ

مصطفی شہاب

---

---

باقی ابھی ہے ترک تمنا کی آرزو
کیوں کر کہوں کہ کوئی تمنا نہیں مجھے

مظفر علی اسیر

---

---

آرزو ہے کہ تو یہاں آئے
اور پھر عمر بھر نہ جائے کہیں

ناصر کاظمی

---

---

مجھے یہ ڈر ہے تری آرزو نہ مٹ جائے
بہت دنوں سے طبیعت مری اداس نہیں

ناصر کاظمی

---

---

بڑی آرزو تھی ہم کو نئے خواب دیکھنے کی
سو اب اپنی زندگی میں نئے خواب بھر رہے ہیں

عبید اللہ علیم

---

---

اس لئے آرزو چھپائی ہے
منہ سے نکلی ہوئی پرائی ہے

قمر جلالوی

---

---

موت آ جائے قید میں صیاد
آرزو ہو اگر رہائی کی

رند لکھنوی

---

---