jo unhen wafa ki sujhi to na zist ne wafa ki
abhi aa ke wo na baiThe ki hum uTh gae jahan se

Abdul Majeed Salik

---

---

ye hijraten hain zamin o zaman se aage ki
jo ja chuka hai use lauT kar nahin aana

Aftab Iqbal Shamim

---

---

ala ki chamak us ke chehre pe thi
mujhe kya KHabar thi ki mar jaega

Ahmad Mushtaq

---

---

kaise aa sakti hai aisi dil-nashin duniya ko maut
kaun kahta hai ki ye sab kuchh fana ho jaega

Ahmad Mushtaq

---

---

maut KHamoshi hai chup rahne se chup lag jaegi
zindagi aawaz hai baaten karo baaten karo

Ahmad Mushtaq

---

---

kaun kahta hai ki maut aai to mar jaunga
main to dariya hun samundar mein utar jaunga

Ahmad Nadeem Qasmi

---

---

nind ko log maut kahte hain
KHwab ka nam zindagi bhi hai

Ahsan Yusuf Zai

---

---