jal bhi chuke parwane ho bhi chuki ruswai
ab KHak uDane ko baiThe hain tamashai
ab dil ko kisi karwaT aaram nahin milta
ek umr ka rona hai do din ki shanasai
ab wusat-e-alam bhi kam hai meri wahshat ko
kya mujh ko Daraegi is dasht ki pahnai
ji mein hai ki is dar se ab hum nahin uTThenge
jis dar pe na jaane ki sau bar qasam khai
Ghazal
Jal bhi chuke parwane ho bhi chuki ruswai
Shahzad Ahmad