haal-e-dil sun ke wo aazurda hain shayad un ko
is hikayat pe shikayat ka guman guzra hai

Abdul Majeed Salik

---

---

zindagi se yahi gila hai mujhe
tu bahut der se mila hai mujhe

Ahmad Faraz

---

---

chup raho to puchhta hai KHair hai
lo KHamoshi bhi shikayat ho gai

Akhtar Ansari Akbarabadi

---

---

sar-e-mahshar yahi puchhunga KHuda se pahle
tu ne roka bhi tha bande ko KHata se pahle

Anand Narayan Mulla

---

---

ek teri be-ruKHi se zamana KHafa hua
ai sang-dil tujhe bhi KHabar hai ki kya hua

Arsh Siddiqui

---

---

hamein to apni tabahi ki dad bhi na mili
teri nawazish-e-beja ka kya gila karte

Arshi Bhopali

---

---

kah ke ye aur kuchh kaha na gaya
ki mujhe aap se shikayat hai

Arzoo Lakhnavi

---

---