آنکھوں تک آ سکی نہ کبھی آنسوؤں کی لہر
یہ قافلہ بھی نقل مکانی میں کھو گیا

عباس تابش

---

---

آ دیکھ کہ میرے آنسوؤں میں
یہ کس کا جمال آ گیا ہے

ادا جعفری

---

---

جوکھم اے مردم دیدہ ہے سمجھ کے رونا
ڈوب بھی جاتے ہیں دریا میں نہانے والے

آغا حجو شرف

---

---

بہتا آنسو ایک جھلک میں کتنے روپ دکھائے گا
آنکھ سے ہو کر گال بھگو کر مٹی میں مل جائے گا

احمد مشتاق

---

---

روک لے اے ضبط جو آنسو کہ چشم تر میں ہے
کچھ نہیں بگڑا ابھی تک گھر کی دولت گھر میں ہے

احسن مارہروی

---

---

وہ ماضی جو ہے اک مجموعہ اشکوں اور آہوں کا
نہ جانے مجھ کو اس ماضی سے کیوں اتنی محبت ہے

اختر انصاری

---

---

اشک جب دیدۂ تر سے نکلا
ایک کانٹا سا جگر سے نکلا

اختر امام رضوی

---

---