kis tarah jama kijiye ab apne aap ko
kaghaz bikhar rahe hain purani kitab ke

Adil Mansuri

---

---

tujhe kitab se mumkin nahin faragh ki tu
kitab-KHwan hai magar sahib-e-kitab nahin

Allama Iqbal

---

---

jise paDhte to yaad aata tha tera phul sa chehra
hamari sab kitabon mein ek aisa bab rahta tha

Asad Badayuni

---

---

kaghaz mein dab ke mar gae kiDe kitab ke
diwana be-paDhe-likhe mashhur ho gaya

Bashir Badr

---

---

qabron mein nahin hum ko kitabon mein utaro
hum log mohabbat ki kahani mein maren hain

Ejaaz tawakkal

---

---

har ek qayas haqiqat se dur-tar nikla
kitab ka na koi dars mo'tabar nikla

Faza Ibn e Faizi

---

---

arud ke badle hathon mein aa jae kitab to achchha ho
ai kash hamari aankhon ka ikkiswan KHwab to achchha ho

Ghulam Mohammad Qasir

---

---