dukh ke safar pe dil ko rawana to kar diya
ab sari umr hath hilate rahenge hum

Ahmad Mushtaq

---

---

hum ne mana ek na ek din lauT ke tu aa jaega
lekin tujh bin umr jo guzri kaun use lauTaega

Akhtar Saeed Khan

---

---

jaane wale ko kahan rok saka hai koi
tum chale ho to koi rokne wala bhi nahin

Aslam Ansari

---

---

agar talash karun koi mil hi jaega
magar tumhaari tarah kaun mujh ko chahega

Bashir Badr

---

---

tumhaare sath ye mausam farishton jaisa hai
tumhaare baad ye mausam bahut sataega

Bashir Badr

---

---

tumhein zarur koi chahaton se dekhega
magar wo aankhen hamari kahan se laega

Bashir Badr

---

---

ye ek peD hai aa is se mil ke ro len hum
yahan se tere mere raste badalte hain

Bashir Badr

---

---