jo chup-chap rahti thi diwar par
wo taswir baaten banane lagi

Adil Mansuri

---

---

jis se ye tabiat baDi mushkil se lagi thi
dekha to wo taswir har ek dil se lagi thi

Ahmad Faraz

---

---

koi taswir mukammal nahin hone pati
dhup dete hain to saya nahin rahne dete

Ahmad Mushtaq

---

---

almari mein taswiren rakhta hun
ab bachpan aur buDhapa ek hue

Akhtar Hoshiyarpuri

---

---

aa ki main dekh lun khoya hua chehra apna
mujh se chhup kar meri taswir banane wale

Akhtar Saeed Khan

---

---

surat chhupaiye kisi surat-parast se
hum dil mein naqsh aap ki taswir kar chuke

Anwar Dehlvi

---

---

wo ayaadat ko to aaya tha magar jate hue
apni taswiren bhi kamre se uTha kar le gaya

Arsh Siddiqui

---

---