tera har raaz chhupae hue baiTha hai koi
KHud ko diwana banae hue baiTha hai koi

Akhtar Siddiqui

---

---

dafn kar sakta hun sine mein tumhaare raaz ko
aur tum chaho to afsana bana sakta hun main

Asrar-ul-Haq Majaz

---

---

ye mere ishq ki majburiyan maaz-allah
tumhaara raaz tumhin se chhupa raha hun main

Asrar-ul-Haq Majaz

---

---

jin ko apni KHabar nahin ab tak
wo mere dil ka raaz kya jaanen

Dagh Dehlvi

---

---

koi samjhega kya raaz-e-gulshan
jab tak uljhe na kanTon se daman

Fana Nizami Kanpuri

---

---

apna hi haal tak na khula mujh ko ta-ba-marg
main kaun hun kahan se chala tha kahan gaya

Hairat Allahabadi

---

---

hae wo raaz-e-gham ki jo ab tak
tere dil mein meri nigah mein hai

Jigar Moradabadi

---

---