goya tumhaari yaad hi mera ilaj hai
hota hai pahron zikr tumhaara tabib se

Agha Hashr Kashmiri

---

---

ek ye bhi to andaz-e-ilaj-e-gham-e-jaan hai
ai chaaragaro dard baDha kyun nahin dete

Ahmad Faraz

---

---

koi dawa na de sake mashwara-e-dua diya
chaaragaron ne aur bhi dard dil ka baDha diya

Hafeez Jalandhari

---

---

kabhi jo zahmat-e-kar-e-rafu nahin karta
hamare zaKHm usi chaaragar ke nam tamam

Irfan Siddiqi

---

---

kis se ummid karen koi elaj-e-dil ki
chaaragar bhi to bahut dard ka mara nikla

Lutf-ur-rahman

---

---

wo dil-nawaz hai lekin nazar-shanas nahin
mera ilaj mere chaara-gar ke pas nahin

Nasir Kazmi

---

---

ai mere chaaragar tere bas mein nahin moamla
surat-e-haal ke liye waqif-e-haal chahiye

Saleem Kausar

---

---