ulfat ka hai maza ki 'asar' gham bhi sath hon
tarikiyan bhi sath rahen raushni ke sath

Asar Akbarabadi

---

---

KHuda ki den hai jis ko nasib ho jae
har ek dil ko gham-e-jawedan nahin milta

this is a gift from God, the blessed are bestowed
not on every heart is this eternal ache endowed

Asar Sahbai

---

---

nawazta tha hamesha wo gham ki daulat se
aur is KHazane se main mala mal ho hi gaya

Ateeq Allahabadi

---

---

ek wo hain ki jinhen apni KHushi le Dubi
ek hum hain ki jinhen gham ne ubharne na diya

Azad Gulati

---

---

use bhi jate hue tum ne mujh se chhin liya
tumhaara gham to meri aarzu ka zewar tha

Azad Gulati

---

---

gham-e-hayat o gham-e-dost ki kashakash mein
hum aise log to ranj-o-malal se bhi gae

Aziz Hamid Madni

---

---

gham-e-uqba gham-e-dauran gham-e-hasti ki qasam
aur bhi gham hain zamane mein mohabbat ke siwa

Aziz Warsi

---

---