صدمہ بت کافر کی محبت کا نہ پوچھو
یہ چوٹ تو کعبے ہی کے پتھر سے لگی ہے

مضطر خیرآبادی

---

---

قبر پر کیا ہوا جو میلا ہے
مرنے والا نرا اکیلا ہے

مضطر خیرآبادی

---

---

قاصد نے خبر آمد دلبر کی اڑا دی
آیا بھی تو کم بخت نے بے پر کی اڑا دی

مضطر خیرآبادی

---

---

پھونکے دیتا ہے کسی کا سوز پنہانی مجھے
اب تو میری آنکھ بھی دیتی نہیں پانی مجھے

مضطر خیرآبادی

---

---

پردے والے بھی کہیں آتے ہیں گھر سے باہر
اب جو آ بیٹھے ہو تم دل میں تو بیٹھے رہنا

مضطر خیرآبادی

---

---

پہلے ہم میں تھے اور اب ہم سے جدا رہتے ہیں
آپ کاہے کو غریبوں سے خفا رہتے ہیں

مضطر خیرآبادی

---

---

پڑا ہوں اس طرح اس در پہ مضطرؔ
کوئی دیکھے تو جانے مار ڈالا

مضطر خیرآبادی

---

---

پڑ گئے زلفوں کے پھندے اور بھی
اب تو یہ الجھن ہے چندے اور بھی

مضطر خیرآبادی

---

---

نگاہوں میں پھرتی ہے آٹھوں پہر
قیامت بھی ظالم کا قد ہو گئی

مضطر خیرآبادی

---

---