dair o kaba mein bhaTakte phir rahe hain raat din
DhunDhne se bhi to bandon ko KHuda milta nahin

Dattatriya Kaifi

---

---

DhunDhne se yun to is duniya mein kya milta nahin
sach agar puchho to sachcha aashna milta nahin

Dattatriya Kaifi

---

---

ek KHwab ka KHayal hai duniya kahen jise
hai is mein ek tilism tamanna kahen jise

Dattatriya Kaifi

---

---

ishq ne jis dil pe qabza kar liya
phir kahan us mein nashat o gham rahe

Dattatriya Kaifi

---

---

kahne ko to kah gae ho sab kuchh
ab koi jawab de to kya ho

Dattatriya Kaifi

---

---

koi dil-lagi dil lagana nahin hai
qayamat hai ye dil ka aana nahin hai

Dattatriya Kaifi

---

---

sab kuchh hai aur kuchh bhi nahin dahr ka wajud
'kaifi' ye baat wo hai muamma kahen jise

Dattatriya Kaifi

---

---

tum se ab kya kahen wo chiz hai dagh-e-gham-e-ishq
ki chhupae na chhupe aur dikhae na bane

Dattatriya Kaifi

---

---

wafa par dagha sulh mein dushmani hai
bhalai ka hargiz zamana nahin hai

Dattatriya Kaifi

---

---