kyun 'munir' apni tabahi ka ye kaisa shikwa
jitna taqdir mein likkha hai ada hota hai

Muneer Niyazi

---

---

lai hai ab uDa ke gae mausamon ki bas
barkha ki rut ka qahr hai aur hum hain dosto

Muneer Niyazi

---

---

liye phira jo mujhe dar-ba-dar zamane mein
KHayal tujh ko dil-e-be-qarar kis ka tha

Muneer Niyazi

---

---

mahak ajab si ho gai paDe paDe sanduq mein
rangat phiki paD gai resham ke rumal ki

Muneer Niyazi

---

---

main to 'munir' aaine mein KHud ko tak kar hairan hua
ye chehra kuchh aur tarah tha pahle kisi zamane mein

Muneer Niyazi

---

---

makan-e-zar lab-e-goya had-e-sipehr-o-zamin
dikhai deta hai sab kuchh yahan KHuda ke siwa

Muneer Niyazi

---

---

makan hai qabr jise log KHud banate hain
main apne ghar mein hun ya main kisi mazar mein hun

Muneer Niyazi

---

---

main us ko dekh ke chup tha usi ki shadi mein
maza to sara isi rasm ke nibah mein tha

Muneer Niyazi

---

---

shayad koi dekhne wala ho jae hairan
kamre ki diwaron par koi naqsh bana kar dekh

Muneer Niyazi

---

---