kaThin hai rahguzar thoDi dur sath chalo
bahut kaDa hai safar thoDi dur sath chalo

Ahmad Faraz

---

---

kaun taqon pe raha kaun sar-e-rahguzar
shahr ke sare charaghon ko hawa jaanti hai

Ahmad Faraz

---

---

kis kis ko bataenge judai ka sabab hum
tu mujh se KHafa hai to zamane ke liye aa

Ahmad Faraz

---

---

kis ko bikna tha magar KHush hain ki is hile se
ho gain apne KHaridar se baaten kya kya

Ahmad Faraz

---

---

kise KHabar wo mohabbat thi ya raqabat thi
bahut se log tujhe dekh kar hamare hue

Ahmad Faraz

---

---

kisi bewafa ki KHatir ye junun 'faraaz' kab tak
jo tumhein bhula chuka hai use tum bhi bhul jao

Ahmad Faraz

---

---

kisi dushman ka koi tir na pahuncha mujh tak
dekhna ab ke mera dost kaman khenchta hai

Ahmad Faraz

---

---

kisi ko ghar se nikalte hi mil gai manzil
koi hamari tarah umr bhar safar mein raha

Ahmad Faraz

---

---

kitna aasan tha tere hijr mein marna jaanan
phir bhi ek umr lagi jaan se jate jate

Ahmad Faraz

---

---