silsile toD gaya wo sabhi jate jate
warna itne to marasim the ki aate jate

Ahmad Faraz

---

---

silwaTen hain mere chehre pe to hairat kyun hai
zindagi ne mujhe kuchh tum se ziyaada pahna

Ahmad Faraz

---

---

sitam to ye hai ki zalim suKHan-shanas nahin
wo ek shaKHs ki shaer bana gaya mujh ko

Ahmad Faraz

---

---

so dekh kar tere ruKHsar o lab yaqin aaya
ki phul khilte hain gulzar ke alawa bhi

Ahmad Faraz

---

---

suna hai bole to baaton se phul jhaDte hain
ye baat hai to chalo baat kar ke dekhte hain

Ahmad Faraz

---

---

suna hai log use aankh bhar ke dekhte hain
so us ke shahr mein kuchh din Thahar ke dekhte hain

Ahmad Faraz

---

---

suna hai us ke badan ki tarash aisi hai
ki phul apni qabaen katar ke dekhte hain

Ahmad Faraz

---

---

suna hai us ko bhi hai sher o shairi se shaghaf
so hum bhi mojaze apne hunar ke dekhte hain

Ahmad Faraz

---

---

tana-e-nashsha na do sab ko ki kuchh soKHta-jaan
shiddat-e-tishna-labi se bhi bahak jate hain

Ahmad Faraz

---

---