ye jo raaton ko mujhe KHwab nahin aate 'ata'
is ka matlab hai mera yar KHafa hai mujh se

Ahmad Ata

---

---

kis kis ko bataenge judai ka sabab hum
tu mujh se KHafa hai to zamane ke liye aa

Ahmad Faraz

---

---

mujh se bigaD gae to raqibon ki ban gai
ghairon mein baT raha hai mera e'tibar aaj

Ahmad Husain Mail

---

---

kisi mashuq ka aashiq se KHafa ho jaana
ruh ka jism se goya hai juda ho jaana

Ahsan Marahravi

---

---

KHafa hain phir bhi aa kar chheD jate hain tasawwur mein
hamare haal par kuchh mehrbani ab bhi hoti hai

Akhtar Shirani

---

---

ishq mein tahzib ke hain aur hi kuchh falsafe
tujh se ho kar hum KHafa KHud se KHafa rahne lage

Alam Khursheed

---

---

meri betabiyon se ghabra kar
koi mujh se KHafa na ho jae

Aleem Akhtar

---

---