main ne dekha hai bahaaron mein chaman ko jalte
hai koi KHwab ki tabir batane wala
Ahmad Faraz
main raat TuT ke roya to chain se soya
ki dil ka zahr meri chashm-e-tar se nikla tha
Ahmad Faraz
mai-kade mein kya takalluf mai-kashi mein kya hijab
bazm-e-saqi mein adab aadab mat dekha karo
Ahmad Faraz
mar gae pyas ke mare to uTha abr-e-karam
bujh gai bazm to ab shama jalata kya hai
when the parched had died of thirst, then the flagon came
the gathering is extinguished now why do you light the flame?
Ahmad Faraz
meri KHatir na sahi apni ana ki KHatir
apne bandon se to pindar KHudai le le
Ahmad Faraz
'mir' ke manind aksar zist karta tha 'faraaz'
tha to wo diwana sa shair magar achchha laga
Ahmad Faraz
muddaten ho gain 'faraaz' magar
wo jo diwangi ki thi hai abhi
Ahmad Faraz
mujh se bichhaD ke tu bhi to roega umr bhar
ye soch le ki main bhi teri KHwahishon mein hun
Ahmad Faraz
munsif ho agar tum to kab insaf karoge
mujrim hain agar hum to saza kyun nahin dete
Ahmad Faraz