putliyan tak bhi to phir jati hain dekho dam-e-naza
waqt paDta hai to sab aankh chura jate hain

Ameer Minai

---

---

kya KHabar mujh ko KHizan kya chiz hai kaisi bahaar
aankhen kholin aa ke main ne KHana-e-sayyaad mein

Amirullah Tasleem

---

---

KHizan ka bhes bana kar bahaar ne mara
mujhe do-rangi-e-lail-o-nahaar ne mara

Arzoo Lakhnavi

---

---

KHizan jab tak chali jati nahin hai
chaman walon ko nind aati nahin hai

Bismil Azimabadi

---

---

anai-e-bahaar pe the sab farefta
afsos koi mahram-e-raaz-e-KHizan na tha

Habeeb Ahmad Siddiqui

---

---

gulon ka daur hai bulbul maze bahaar mein luT
KHizan machaegi aate hi is dayar mein luT

Habeeb Musvi

---

---

afsurdagi bhi husn hai tabindagi bhi husn
hum ko KHizan ne tum ko sanwara bahaar ne

Ijtiba Rizvi

---

---