phir wahi lambi do-pahren-surmai hain phir wahi dil ki haalat hai
bahar kitna sannaTa hai andar kitni wahshat hai

Aitbar Sajid

---

---

paD jaen mere jism pe lakh aable 'akbar'
paDh kar jo koi phunk de april may june

Akbar Allahabadi

---

---

dhup ki garmi se inTen pak gain phal pak gae
ek hamara jism tha aKHtar jo kachcha rah gaya

Akhtar Hoshiyarpuri

---

---

garmi lagi to KHud se alag ho ke so gae
sardi lagi to KHud ko dobara pahan liya

Bedil Haidri

---

---

dopahar ki dhup mein mere bulane ke liye
wo tera koThe pe nange panw aana yaad hai

Hasrat Mohani

---

---

garmi ne kuchh aag aur bhi sine mein lagai
har taur gharaz aap se milna hi kam achchha

Insha Allah Khan u0027Inshau0027

---

---

pighalte dekh ke suraj ki garmi
abhi masum kirnen ro gai hain

Jalib Nomani

---

---