supurdagi ka wo lamha kabhi nahin guzra
hazar bar mare hum hazar bar jiye

Shahzad Ahmad

---

---

taKHta-e-dar pe chahe jise laTka dije
itne logon mein gunahgar koi to hoga

Shahzad Ahmad

---

---

Takraata hai sar phoDta hai sara zamana
diwar ko raste se haTata nahin phir bhi

Shahzad Ahmad

---

---

talash karni thi ek roz apni zat mujhe
ye bhut bhi mere sar par sawar hona tha

Shahzad Ahmad

---

---

tamam umr hawa phankte hue guzri
rahe zamin pe magar KHak ka maza na liya

Shahzad Ahmad

---

---

tanhai mein aa jati hain huren mere ghar mein
chamkate hain masjid ke dar-o-baam farishte

Shahzad Ahmad

---

---

tere sine mein bhi ek dagh hai tanhai ka
jaanta main to kabhi dur na hota tujh se

Shahzad Ahmad

---

---

teri qurbat mein guzare hue kuchh lamhe hain
dil ko tanhai ka ehsas dilane wale

Shahzad Ahmad

---

---

Thahar gai hai tabiat ise rawani de
zamin pyas se marne lagi hai pani de

Shahzad Ahmad

---

---