sabhi ko gham hai samundar ke KHushk hone ka
ki khel KHatm hua kashtiyan Dubone ka

Shahryar

---

---

safar ka nashsha chaDha hai to kyun utar jae
maza to jab hai koi lauT ke na ghar jae

Shahryar

---

---

sham hote hi khuli saDkon ki yaad aati hai
sochta roz hun main ghar se nahin niklunga

Shahryar

---

---

shadid pyas thi phir bhi chhua na pani ko
main dekhta raha dariya teri rawani ko

Shahryar

---

---

shahr-e-ummid haqiqat mein nahin ban sakta
to chalo us ko tasawwur hi mein tamir karen

Shahryar

---

---

shikwa koi dariya ki rawani se nahin hai
rishta hi meri pyas ka pani se nahin hai

Shahryar

---

---

sine mein jalan aankhon mein tufan sa kyun hai
is shahr mein har shaKHs pareshan sa kyun hai

Shahryar

---

---

siyah raat nahin leti nam Dhalne ka
yahi to waqt hai suraj tere nikalne ka

Shahryar

---

---

ye ek shajar ki jis pe na kanTa na phul hai
sae mein us ke baiTh ke rona fuzul hai

Shahryar

---

---