ajib saneha mujh par guzar gaya yaro
main apne sae se kal raat Dar gaya yaro

Shahryar

---

---

aandhiyan aati thin lekin kabhi aisa na hua
KHauf ke mare juda shaKH se patta na hua

Shahryar

---

---

ab to le de ke yahi kaam hai in aaankhon ka
jin ko dekha nahin un KHwabon ki tabir karen

Shahryar

---

---

ab raat ki diwar ko Dhana hai zaruri
ye kaam magar mujh se akele nahin hoga

Shahryar

---

---

ab ji ke bahalne ki hai ek yahi surat
biti hui kuchh baaten hum yaad karen phir se

Shahryar

---

---

ab jidhar dekhiye lagta hai ki is duniya mein
kahin kuchh chiz ziyaada hai kahin kuchh kam hai

Shahryar

---

---

aasman kuchh bhi nahin ab tere karne ke liye
main ne sab tayyariyan kar li hain marne ke liye

Shahryar

---

---

aankhon mein teri dekh raha hun main apni shakl
ye koi wahima ye koi KHwab to nahin

Shahryar

---

---

aankhon ko sab ki nind bhi di KHwab bhi diye
hum ko shumar karti rahi dushmanon mein raat

Shahryar

---

---