gulshan mein na hum honge to phir sog hamara
gul-pairahan o ghuncha-dahan karte rahenge

Abul Mujahid Zahid

---

---

main ne dekha hai bahaaron mein chaman ko jalte
hai koi KHwab ki tabir batane wala

Ahmad Faraz

---

---

wahi gulshan hai lekin waqt ki parwaz to dekho
koi tair nahin pichhle baras ke aashiyanon mein

Ahmad Mushtaq

---

---

kya isi waste sincha tha lahu se apne
jab sanwar jae chaman aag laga di jae

Ali Ahmad Jalili

---

---

gulon mein rang bhare baad-e-nau-bahaar chale
chale bhi aao ki gulshan ka karobar chale

Faiz Ahmad Faiz

---

---

koi samjhega kya raaz-e-gulshan
jab tak uljhe na kanTon se daman

Fana Nizami Kanpuri

---

---

main us gulshan ka bulbul hun bahaar aane nahin pati
ki sayyaad aan kar mera gulistan mol lete hain

Haidar Ali Aatish

---

---