sahil ke sukun se kise inkar hai lekin
tufan se laDne mein maza aur hi kuchh hai

Aal-e-Ahmad Suroor

---

---

aDh ke tufan ko aaghosh mein le le apni
Dubne wale tere hath se sahil to gaya

Abdul Hamid Adam

---

---

lazzat-e-gham to baKHsh di us ne
hausle bhi 'adam' diye hote

Abdul Hamid Adam

---

---

main aandhiyon ke pas talash-e-saba mein hun
tum mujh se puchhte ho mera hausla hai kya

Ada Jafri

---

---

mere TuTe hausle ke par nikalte dekh kar
us ne diwaron ko apni aur uncha kar diya

Adil Mansuri

---

---

log kahte hain badalta hai zamana sab ko
mard wo hain jo zamane ko badal dete hain

Akbar Allahabadi

---

---

inhi gham ki ghaTaon se KHushi ka chand niklega
andheri raat ke parde mein din ki raushni bhi hai

Akhtar Shirani

---

---