wo so raha hai KHuda dur aasmanon mein
farishte loriyan gate hain us ke kanon mein

Abdur Rahim Nashtar

---

---

ut badli to zamin ke chehre ka ghaza bhi badla
rang magar KHud aasman ne badle kaise kaise

Akbar Hyderabadi

---

---

uqabi ruh jab bedar hoti hai jawanon mein
nazar aati hai un ko apni manzil aasmanon mein

Allama Iqbal

---

---

aasman apne iradon mein magan hai lekin
aadmi apne KHayalat liye phirta hai

Anwar Masood

---

---

hazar raste badle hazar swang rache
magar hai raqs mein sar par ek aasman wahi

Aslam Emadi

---

---

aasman ek sulagta hua sahra hai jahan
DhunDhta phirta hai KHud apna hi saya suraj

Azad Gulati

---

---

kabhi to aasman se chand utre jam ho jae
tumhaare nam ki ek KHub-surat sham ho jae

Bashir Badr

---

---