aarzu KHub hai mauqa se agar ho warna
apne maqsud ko kam pahunche hain bisyar-tala

Nazeer Akbarabadi

---

---

aate hi jo tum mere gale lag gae wallah
us waqt to is garmi ne sab mat ki garmi

Nazeer Akbarabadi

---

---

ab to zara sa ganw bhi beTi na de use
lagta tha warna chin ka damad aagara

Nazeer Akbarabadi

---

---

abas mehnat hai kuchh hasil nahin patthar-tarashi se
yahi mazmun tha farhad ke teshe ki khaT-khaT ka

Nazeer Akbarabadi

---

---

abhi kahen to kisi ko na e'tibar aawe
ki hum ko rah mein ek aashna ne luT liya

Nazeer Akbarabadi

---

---

ai chashm jo ye ashk tu bhar lai hai kam-baKHt
is mein to sarasar meri ruswai hai kam-baKHt

Nazeer Akbarabadi

---

---

ajab mushkil hai kya kahiye baghair-az-jaan dene ke
koi naqsha nazar aata nahin aasan milne ka

Nazeer Akbarabadi

---

---

akela us ko na chhoDa jo ghar se nikla wo
har ek bahane se main us sanam ke sath raha

Nazeer Akbarabadi

---

---

ashkon ke tasalsul ne chhupaya tan-e-uryan
ye aab-e-rawan ka hai naya pairahan apna

Nazeer Akbarabadi

---

---