sarsabz rakhiyo kisht ko ai chashm tu meri
teri hi aab se hai bas ab aabru meri

Nazeer Akbarabadi

---

---

shab ko aa kar wo phir gaya haihat
kya isi raat hum ko sona tha

Nazeer Akbarabadi

---

---

shahr-e-dil aabaad tha jab tak wo shahr-ara raha
jab wo shahr-ara gaya phir shahr-e-dil mein kya raha

Nazeer Akbarabadi

---

---

suno main KHun ko apne sath le aaya hun aur baqi
chale aate hain uThte baiThte laKHt-e-jigar pichhe

Nazeer Akbarabadi

---

---

tar rakhiyo sada ya-rab tu is mizha-e-tar ko
hum itr lagate hain garmi mein isi KHas ka

Nazeer Akbarabadi

---

---

teshe ki kya majal thi ye jo tarashe be sutun
tha wo tamam dil ka zor jis ne pahaD Dha diya

Nazeer Akbarabadi

---

---

tha irada teri fariyaad karen hakim se
wo bhi ai shoKH tera chahne wala nikla

Nazeer Akbarabadi

---

---

Thaharna ishq ke aafat ke sadmon mein 'nazir'
kaam mushkil tha par allah ne aasan kiya

Nazeer Akbarabadi

---

---

the hum to KHud-pasand bahut lekin ishq mein
ab hai wahi pasand jo ho yar ko pasand

Nazeer Akbarabadi

---

---