hum ko bhi KHush-numa nazar aai hai zindagi
jaise sarab dur se dariya dikhai de

Mahshar Badayuni

---

---

kisi ki bazm ke haalat ne samjha diya mujh ko
ki jab saqi nahin apna to mai apni na jam apna

Mahshar Inayati

---

---

fareb-e-saqi-e-mahfil na puchhiye 'majruh'
sharab ek hai badle hue hain paimane

Majrooh Sultanpuri

---

---

aaKHir gil apni sarf-e-dar-e-mai-kada hui
pahunchi wahin pe KHak jahan ka KHamir tha

Meerza Jawan Bakht Jahandar

---

---

manen jo meri baat muridan-e-be-riya
den shaiKH ko kafan to Dubo kar sharab mein

Mirza Mayal Dehlvi

---

---

talKHi tumhaare waz mein hai waizo magar
dekho to kis maze ki hai talKHi sharab mein

Mirza Mayal Dehlvi

---

---

shikast-e-tauba ki tamhid hai teri tauba
zaban pe tauba 'mubarak' nigah saghar pa

Mubarak Azimabadi

---

---