بسان آئنہ ہم نے تو چشم وا کر لی
جدھر نگاہ کی صاف اس کو برملا دیکھا

شاہ نصیر

---

---

آ کے سلاسل اے جنوں کیوں نہ قدم لے بعد قیس
اس کا بھی ہم نے سلسلہ از سر نو بپا کیا

شاہ نصیر

---

---

بجائے آب مے نرگسی پلا مجھ کو
غذا کچھ اور نہ بادام کے سوا ٹھہرا

شاہ نصیر

---

---

بعد مجنوں کیوں نہ ہوں میں کار فرمائے جنوں
عشق کی سرکار سے ملبوس رسوائی ملا

شاہ نصیر

---

---

اے خال رخ یار تجھے ٹھیک بناتا
جا چھوڑ دیا حافظ قرآن سمجھ کر

شاہ نصیر

---

---

ابر نیساں کی بھی جھڑ جائے گی پل میں شیخی
دیدۂ تر کو اگر اشک فشاں کیجئے گا

شاہ نصیر

---

---

آتا ہے تو آ وعدہ فراموش وگرنہ
ہر روز کا یہ لیت و لعل جائے تو اچھا

شاہ نصیر

---

---

آمد و شد کوچے میں ہم اس کے کیوں نہ کریں مانند نفس
زندگی اپنی جانتے ہیں اس واسطے آتے جاتے ہیں

شاہ نصیر

---

---

آنکھوں سے تجھ کو یاد میں کرتا ہوں روز و شب
بے دید مجھ سے کس لیے بیگانہ ہو گیا

شاہ نصیر

---

---