main sach kahungi magar phir bhi haar jaungi
wo jhuT bolega aur la-jawab kar dega

Parveen Shakir

---

---

main us ki dastaras mein hun magar wo
mujhe meri raza se mangta hai

Parveen Shakir

---

---

maqtal-e-waqt mein KHamosh gawahi ki tarah
dil bhi kaam aaya hai gumnam sipahi ki tarah

Parveen Shakir

---

---

masala jab bhi charaghon ka uTha
faisla sirf hawa karti hai

Parveen Shakir

---

---

mere chehre pe ghazal likhti gain
sher kahti hui aankhen us ki

Parveen Shakir

---

---

meri chadar to chhini thi sham ki tanhai mein
be-ridai ko meri phir de gaya tashhir kaun

Parveen Shakir

---

---

meri talab tha ek shaKHs wo jo nahin mila to phir
hath dua se yun gira bhul gaya sawal bhi

Parveen Shakir

---

---

mumkina faislon mein ek hijr ka faisla bhi tha
hum ne to ek baat ki us ne kamal kar diya

Parveen Shakir

---

---

na jaane kaun sa aaseb dil mein basta hai
ki jo bhi Thahra wo aaKHir makan chhoD gaya

Parveen Shakir

---

---