mein hashr ko kya roun ki uTh jaane se tere
barpa hui ek mujh pe qayamat to yahin au

Meer Hasan

---

---

main ne jo kaha mujh pe kya kya na sitam guzra
bola ki abe tera rote hi janam guzra

Meer Hasan

---

---

main ne paya na ise shahr mein na sahra mein
tu ne le ja ke mere dil ko kahan chhoD diya

Meer Hasan

---

---

main to is Dar se kuchh nahin kahta
tu mabaada udas ho jawe

Meer Hasan

---

---

mar gaya hota na hoti qahr mein shamil jo mehr
sehhat-e-dil is dawa-e-mo'tadil ne ki gharaz

Meer Hasan

---

---

mat baKHt-e-KHufta par mere hans ai raqib tu
hoga tere nasib bhi ye KHwab dekhna

Meer Hasan

---

---

mat ponchh abru-e-araq-alud hath se
lazim hai ehtiyat ki hai aab-dar tegh

Meer Hasan

---

---

na gharaz mujh ko hai kafir se na din-dar se kaam
roz-o-shab hai mujhe us kakul-e-KHamdar se kaam

Meer Hasan

---

---

mu se saped ne namak is mein mila diya
kaifiyyat ab rahi nahin jam-e-sharab mein

Meer Hasan

---

---