KHuda jaane palak se kyunki lagti hai palak hamdam
kabhi aaankhon se hum ne to na dekha apne sone ko

Meer Hasan

---

---

KHwah kaba ho ki but-KHana gharaz hum se sun
jis taraf dil ki tabiat ho udhar ko chaliye

Meer Hasan

---

---

kis waqt mein basa tha ilahi ye mulk-e-dil
sadme hi paDte rahte hain nit is dayar pa

Meer Hasan

---

---

kucha-e-yar hai aur dair hai aur kaba hai
dekhiye ishq hamein aah kidhar lawega

Meer Hasan

---

---

kya jaaniye ki baham kyun hum mein aur us mein
mauquf ho gaya hai ab wo tapak hona

Meer Hasan

---

---

kya shikwa karen kunj-e-qafas ka dil-e-muztar
hum ne to chaman mein bhi Tuk aaram na paya

Meer Hasan

---

---

kya tha ki aaj naqa be-sarban paya
majnun ke hath hum ne us ki mahaar dekhi

Meer Hasan

---

---

kyun giraftari ke bais muztarib sayyaad hun
lagte lagte ji qafas mein bhi mera lag jaega

Meer Hasan

---

---

kyun in dinon 'hasan' tu itna jhaTak gaya hai
zalim kahin tera dil kya phir aTak gaya hai

Meer Hasan

---

---