agarche kahne ko kal kaenat apni thi
haqiqatan kahan apni bhi zat apni thi

Masooda Hayat

---

---

ek KHushbu si ubharti hai nafas se mere
ho na ho aaj koi aan basa hai mujh mein

Masooda Hayat

---

---

ghar se jo shaKHs bhi nikle wo sambhal kar nikle
jaane kis moD pe kis hath mein KHanjar nikle

Masooda Hayat

---

---

hazar dard sameTe hue hun ek dil mein
bikhar gai jo meri dastan to kya hoga

Masooda Hayat

---

---

hazar shauq numayan the jis nazar se kabhi
wahi nigah baDi ajnabi si lagti hai

Masooda Hayat

---

---

KHushbu si koi aae to lagta hai ki tum ho
shisha kahin Takrae to lagta hai ki tum ho

Masooda Hayat

---

---

kis se shikwa karen virani-e-hasti ka 'hayat'
hum ne KHud apni tamannaon ko jine na diya

Masooda Hayat

---

---

kya gharaz hum ko wahan ab koi bhi aabaad ho
hum to us basti se ghar apna uTha kar le gae

Masooda Hayat

---

---

tamam umr bhaTakte rahe jo rahon mein
dikha rahe hain wahi aaj rasta mujh ko

Masooda Hayat

---

---