dikhai KHwab mein di thi Tuk ek munh ki jhalak hum kun
nahin taqat ankhiyon ke kholne ki ab talak hum kun

Abroo Shah Mubarak

---

---

ala-e-jaan thi jo bazm-e-tamasha chhoD di main ne
KHusha ai zindagi KHwabon ki duniya chhoD di main ne

Abu Mohammad Sahar

---

---

darwaza khaTkhaTa ke sitare chale gae
KHwabon ki shaal oDh ke main unghta raha

Adil Mansuri

---

---

nind bhi jagti rahi pure hue na KHwab bhi
subh hui zamin par raat Dhali mazar mein

Adil Mansuri

---

---

kabhi jo yar ko dekha to KHwab mein dekha
meri murad bhi aai to mustaar aai

Agha Hajju Sharaf

---

---

nahin karte wo baaten aalam-e-ruya mein bhi hum se
KHushi ke KHwab bhi dekhen to be-tabir hote hain

Agha Hajju Sharaf

---

---

kisi ko KHwab mein aksar pukarte hain hum
'ata' isi liye sote mein honT hilte hain

Ahmad Ata

---

---