mere KHwabon mein bhi tu mere KHayalon mein bhi tu
kaun si chiz tujhe tujh se juda pesh karun

Sahir Ludhianvi

---

---

kahani likhte hue dastan sunate hue
wo so gaya hai mujhe KHwab se jagate hue

Saleem Kausar

---

---

usi ke KHwab the sare usi ko saunp diye
so wo bhi jit gaya aur main bhi haara nahin

Sarfraz Khalid

---

---

main sochta hun magar yaad kuchh nahin aata
ki iKHtitam kahan KHwab ke safar ka hua

Shahryar

---

---

ye jab hai ki ek KHwab se rishta hai hamara
din Dhalte hi dil Dubne lagta hai hamara

Shahryar

---

---

ishq us ka aan kar yak-bargi sab le gaya
jaan se aaram sar se hosh aur chashmon se KHwa

Shaikh Zahuruddin Hatim

---

---

muddat se KHwab mein bhi nahin nind ka KHayal
hairat mein hun ye kis ka mujhe intizar hai

Shaikh Zahuruddin Hatim

---

---