dekhne wale mujhe meri nazar se dekh le
main teri nazron mein hun aur main hi har manzar mein hun

Azad Gulati

---

---

ek wo hain ki jinhen apni KHushi le Dubi
ek hum hain ki jinhen gham ne ubharne na diya

Azad Gulati

---

---

har ek ne dekha mujhe apni apni nazron se
koi to meri nazar se bhi dekhta mujh ko

Azad Gulati

---

---

kis se puchhen raat-bhar apne bhaTakne ka sabab
sab yahan milte hain jaise nind mein jage hue

Azad Gulati

---

---

kise milti najat 'azad' hasti ke masail se
ki har koi muqayyad aab o gil ke silsilon ka tha

Azad Gulati

---

---

kuchh aise phul bhi guzre hain meri nazron se
jo khil ke bhi na samajh pae zindagi kya hai

Azad Gulati

---

---

main sath le ke chalunga tumhein ai ham-safro
main tum se aage hun lekin Thaharne wala hun

Azad Gulati

---

---