khule asrar us par jism ke aahista aahista
bahut din mein use baaten na karne ka hunar aaya

Shahzad Ahmad

---

---

khuli faza mein agar laDkhaDa ke chal na saken
to zahr pina hai behtar sharab pine se

Shahzad Ahmad

---

---

KHusha wo dard ke lamhe ki tere jaane par
hamari anjuman-e-gham mein lauT aae hain

Shahzad Ahmad

---

---

KHwahishon ki dhul se chehre ubharte hi nahin
hum ne kar ke dekh lin KHwabon ki tabiren bahut

Shahzad Ahmad

---

---

kis liye wo shahr ki diwar se sar phoDta
qais diwana sahi itna bhi diwana na tha

Shahzad Ahmad

---

---

koi batao ki kis ke liye talash karen
jahan chhupi hain bahaaren hamein KHabar hi sahi

Shahzad Ahmad

---

---

koi to raat ko dekhega jawan hote hue
is bhare shahr mein bedar koi to hoga

Shahzad Ahmad

---

---

kuchh dekhne ki dil mein tamanna nahin baqi
kya apni bhi taqat se siwa dekh liya hai

Shahzad Ahmad

---

---

kuchh tazkira-e-husn se raushan the dar-o-baam
kuchh shama ne bhi bazm ko chamkaya hua tha

Shahzad Ahmad

---

---