thoDi si aur zaKHm ko gahrai mil gai
thoDa sa aur dard ka ehsas ghaT gaya

Qateel Shifai

---

---

thak gaya main karte karte yaad tujh ko
ab tujhe main yaad aana chahta hun

Qateel Shifai

---

---

a-pas-e-dil jise apne labon se bhi chhupaya tha
mera wo raaz tere hijr ne pahuncha diya sab tak

Qateel Shifai

---

---

haalat se KHauf kha raha hun
shishe ke mahal bana raha hun

Qateel Shifai

---

---

gungunati hui aati hain falak se bunden
koi badli teri pazeb se Takrai hai

Qateel Shifai

---

---

girte hain samundar mein baDe shauq se dariya
lekin kisi dariya mein samundar nahin girta

Qateel Shifai

---

---

garmi-e-hasrat-e-nakaam se jal jate hain
hum charaghon ki tarah sham se jal jate hain

I burn up in the flames of unfulfilled desire
like lanterns are, at eventide I am set afire

Qateel Shifai

---

---

dur tak chhae the baadal aur kahin saya na tha
is tarah barsat ka mausam kabhi aaya na tha

Qateel Shifai

---

---

dushmani mujh se kiye ja magar apna ban kar
jaan le le meri sayyaad magar pyar ke sath

Qateel Shifai

---

---