kahin na un ki nazar se nazar kisi ki laDe
wo is lihaz se aankhen jhukae baiThe hain

Nooh Narvi

---

---

kah rahi hai ye teri taswir bhi
main kisi se bolne wali nahin

Nooh Narvi

---

---

kaba ho ki but-KHana ho ai hazrat-e-waiz
jaenge jidhar aap na jaenge udhar hum

Nooh Narvi

---

---

kaba ho dair ho donon mein hai jalwa us ka
ghaur se dekhe agar dekhne wala us ka

Nooh Narvi

---

---

jo waqt jaega wo palaT kar na aaega
din raat chahiye sahar-o-sham ka lihaz

Nooh Narvi

---

---

jo ahl-e-zauq hain wo lutf uTha lete hain chal phir kar
gulistan ka gulistan mein bayaban ka bayaban mein

Nooh Narvi

---

---

jigar ki choT upar se kahin malum hoti hai
jigar ki choT upar se nahin malum hoti hai

Nooh Narvi

---

---

jab zikr kiya main ne kabhi wasl ka un se
wo kahne lage pak mohabbat hai baDi chiz

Nooh Narvi

---

---

jaane ko jae fasl-e-gul aane ko aae har baras
hum gham-zadon ke waste jaise chaman waise qafas

Nooh Narvi

---

---