ye mere pas jo chup-chap aae baiThe hain
hazar fitna-e-mahshar uThae baiThe hain
adu se bazm-e-adu mein laDa rahe ho nigah
nahin KHayal ki apne parae baiThe hain
kahin na un ki nazar se nazar kisi ki laDe
wo is lihaz se aankhen jhukae baiThe hain
koi hasin nazar aaya ye be-qarar hue
janab-e-'nuh' ko hum aazmae baiThe hain
Ghazal
Ye mere pas jo chup-chap aae baiThe hain
Nooh Narvi