wo kahte hain ye sari bewafai hai mohabbat ki
na 'muztar' be-wafa main hun na 'muztar' be-wafa tum ho

Muztar Khairabadi

---

---

wo karenge wasl ka wada wafa
rang gahre hain hamari sham ke

Muztar Khairabadi

---

---

wo mazaq-e-ishq hi kya ki jo ek hi taraf ho
meri jaan maza to jab hai ki tujhe bhi kal na aae

Muztar Khairabadi

---

---

wo pas aane na pae ki aai maut ki nind
nasib so gae masruf-e-KHwab kar ke mujhe

Muztar Khairabadi

---

---

wo pahli sab wafaen kya huin ab ye jafa kaisi
wo pahli sab adaen kya huin ab ye ada kyun hai

Muztar Khairabadi

---

---

wo qudrat ke namune kya hue jo us mein pahle the
main kaba kya karun mujh se ye ghar dekha nahin jata

Muztar Khairabadi

---

---

wo shayad hum se ab tark-e-talluq karne wale hain
hamare dil pe kuchh afsurdagi si chhai jati hai

Muztar Khairabadi

---

---

yaad karna hi hum ko yaad raha
bhul jaana bhi tum nahin bhule

Muztar Khairabadi

---

---

yahan se jab gai thi tab asar par KHar khae thi
wahan se phul barsati hui palTi dua meri

Muztar Khairabadi

---

---