ek sadma-e-mohabbat ek sadma-e-judai
ginti ke do hain lekin lakhon ki jaan par hain

Muztar Khairabadi

---

---

ikaTThe kar ke teri dusri taswir khinchunga
wo sab jalwe jo chhan chhan kar teri chilman se niklenge

Muztar Khairabadi

---

---

ilaj-e-dard-e-dil tum se masiha ho nahin sakta
tum achchha kar nahin sakte main achchha ho nahin sakta

Muztar Khairabadi

---

---

in buton ki hi mohabbat se KHuda milta hai
kafiron ko jo na chahe wo musalman nahin

Muztar Khairabadi

---

---

is se pahle main kabhi aabaad ghar basti mein tha
aaj 'muztar' ek ujDa jhonpaDa jangal mein hun

Muztar Khairabadi

---

---

ishq ka kanTa hamare dil mein ye kah kar chubha
ab nikalwao to tum un se nikalwana mujhe

Muztar Khairabadi

---

---

isi ko pi ke hoti hai shifa bimar-e-ulfat ko
dawa qatil tere talwar ke pani ko kahte hain

Muztar Khairabadi

---

---

ja ke ab nar-e-jahannam ki KHabar le zahid
naddiyan bah gain ashkon ki gunahgaron mein

Muztar Khairabadi

---

---

jaan dena nahin kise manzur
tu kisi kaam se to aaega

Muztar Khairabadi

---

---