tasawwur KHana-abaadi karega
tere ghar main rahunga mere ghar tu

Muztar Khairabadi

---

---

tasawwur mein tera dar apne sar tak khinch leta hun
sitamgar main nahin chalta teri diwar chalti hai

Muztar Khairabadi

---

---

tere ghar aaen to iman ko kis par chhoDen
hum to kabe hi mein ai dushman-e-din achchhe hain

Muztar Khairabadi

---

---

tere mu-e-mizha khaTakte hain
dil ke chhaalon mein nok-e-KHar kahan

Muztar Khairabadi

---

---

teri rahmat ka nam sun sun kar
mubtala ho gaya gunahon mein

Muztar Khairabadi

---

---

teri uljhi hui baaton se mera dil uljha
tere bikhre hue baalon ne pareshan kiya

Muztar Khairabadi

---

---

Thaharna dil mein kuchh behtar na jaana
bhare ghar ko unhon ne ghar na jaana

Muztar Khairabadi

---

---

tum agar chaho to miTTi se abhi paida hon phul
main agar mangun to dariya bhi na de pani mujhe

Muztar Khairabadi

---

---

tum kyun shab-e-judai parde mein chhup gae ho
qismat ke aur tare sab aasman par hain

Muztar Khairabadi

---

---