tumhaari jalwa-gah-e-naz mein andher hi kab tha
ye musa dauD kar kis ko dikhane shama tur aae

Muztar Khairabadi

---

---

tumhein chahun tumhaare chahne walon ko bhi chahun
mera dil pher do mujh se ye jhagDa ho nahin sakta

Muztar Khairabadi

---

---

tu na aaega to ho jaengi KHushiyan sab KHak
id ka chand bhi KHali ka mahina hoga

Muztar Khairabadi

---

---

uDa kar KHak hum kabe jo pahunche
haqiqat khul gai ku-e-butan ki

Muztar Khairabadi

---

---

umr sab zauq-e-tamasha mein guzari lekin
aaj tak ye na khula kis ke talabgar hain hum

Muztar Khairabadi

---

---

un ka ek patla sa KHanjar un ka ek nazuk sa hath
wo to ye kahiye meri gardan KHushi mein kaT gai

Muztar Khairabadi

---

---

un ko aati thi nind aur mujh ko
apna qissa tamam karna tha

Muztar Khairabadi

---

---

unhon ne kya na kiya aur kya nahin karte
hazar kuchh ho magar ek wafa nahin karte

Muztar Khairabadi

---

---

us ka bhi ek waqt hai aane do maut ko
'muztar' KHuda ki yaad abhi kyun kare koi

Muztar Khairabadi

---

---