us husn ka shewa hai jab ishq nazar aae
parde mein chale jaana sharmae hue rahna

Muneer Niyazi

---

---

us ko bhi to ja kar dekho us ka haal bhi mujh sa hai
chup chup rah kar dukh sahne se to insan mar jata hai

Muneer Niyazi

---

---

uTha tu ja bhi chuka tha ajib mehman tha
sadaen de ke mujhe nind se jaga bhi gaya

Muneer Niyazi

---

---

wahm ye tujh ko ajab hai ai jamal-e-kam-numa
jaise sab kuchh ho magar tu did ke qabil na ho

Muneer Niyazi

---

---

waqt kis tezi se guzra roz-marra mein 'munir'
aaj kal hota gaya aur din hawa hote gae

Muneer Niyazi

---

---

wo jis ko main samajhta raha kaamyab din
wo din tha meri umr ka sab se KHarab din

Muneer Niyazi

---

---

wo jo mere pas se ho kar kisi ke ghar gaya
reshmi malbus ki KHushbu se jadu kar gaya

Muneer Niyazi

---

---

wo khaDa hai ek bab-e-ilm ki dahliz par
main ye kahta hun use is KHauf mein daKHil na ho

Muneer Niyazi

---

---

ye ajnabi si manzilen aur raftagan ki yaad
tanhaiyon ka zahr hai aur hum hain dosto

Muneer Niyazi

---

---