tumhaare waz mein tasir to hai hazrat-e-waiz
asar lekin nigah-e-naz ka bhi kam nahin hota

Akbar Allahabadi

---

---

tum nak chaDhate ho meri baat pe ai shaiKH
khinchungi kisi rose main ab kan tumhaare

Akbar Allahabadi

---

---

teri zulfon mein dil uljha hua hai
bala ke pech mein aaya hua hai

Akbar Allahabadi

---

---

tifl mein bu aae kya man bap ke atwar ki
dudh to Dibbe ka hai talim hai sarkar ki

Akbar Allahabadi

---

---

tayyar the namaz pe hum sun ke zikr-e-hur
jalwa buton ka dekh ke niyat badal gai

Akbar Allahabadi

---

---

tashbih tere chehre ko kya dun gul-e-tar se
hota hai shagufta magar itna nahin hota

Akbar Allahabadi

---

---

tahsin ke laeq tera har sher hai 'akbar'
ahbab karen bazm mein ab wah kahan tak

Akbar Allahabadi

---

---

ahta hai ibaadat mein hamein maut ka khaTka
hum yaad-e-KHuda karte hain, kar le na KHuda yaad

As I pray I am afraid that death should not befall
While I do remember God, he should not recall

Akbar Allahabadi

---

---

ah-o-rasm-e-mohabbat in hasinon se main kya rakkhun
jahan tak dekhta hun nafa un ka hai zarar apna

Akbar Allahabadi

---

---