yahi hai zindagi kuchh KHwab chand ummiden
inhin khilaunon se tum bhi bahal sako to chalo

Nida Fazli

---

---

KHak aur KHun se ek shama jalai hai 'nushur'
maut se hum ne bhi sikhi hai hayat-arai

Nushur Wahidi

---

---

zindagi parchhaiyan apni liye
aainon ke darmiyan se aai hai

Nushur Wahidi

---

---

ek musht-e-KHak aur wo bhi hawa ki zad mein hai
zindagi ki bebasi ka istiara dekhna

Parveen Shakir

---

---

kabhi khole to kabhi zulf ko bikhrae hai
zindagi sham hai aur sham Dhali jae hai

Prem Warbartani

---

---

kuchh to hai baat jo aati hai qaza ruk ruk ke
zindagi qarz hai qiston mein ada hoti hai

Qamar Jalalabadi

---

---

zindagi mahw-e-KHud-arai thi
aankh uTha kar bhi na dekha hum ne

Ravish Siddiqi

---

---