han kabhi KHwab-e-ishq dekha tha
ab tak aankhon se KHun Tapakta hai

Akhtar Ansari

---

---

ilaj-e-'aKHtar'-e-na-kaam kyun nahin mumkin
agar wo ji nahin sakta to mar to sakta hai

Akhtar Ansari

---

---

is mein koi mera sharik nahin
mera dukh aah sirf mera hai

Akhtar Ansari

---

---

jab se munh ko lag gai 'aKHtar' mohabbat ki sharab
be-piye aaThon pahar madhosh rahna aa gaya

Akhtar Ansari

---

---

koi maal-e-mohabbat mujhe batao nahin
main KHwab dekh raha hun mujhe jagao nahin

Akhtar Ansari

---

---

koi roe to main be-wajh KHud bhi rone lagta hun
ab 'aKHtar' chahe tum kuchh bhi kaho ye meri fitrat hai

Akhtar Ansari

---

---

main kisi se apne dil ki baat kah sakta na tha
ab suKHan ki aaD mein kya kuchh na kahna aa gaya

Akhtar Ansari

---

---