zara sa gham hua aur ro diye hum
baDi nazuk tabiat ho gai hai

Shahzad Ahmad

---

---

teri qurbat mein guzare hue kuchh lamhe hain
dil ko tanhai ka ehsas dilane wale

Shahzad Ahmad

---

---

shak apni hi zat pe hone lagta hai
apni baaten dusron se jab sunte hain

Shahzad Ahmad

---

---

shama jalte hi yahan hashr ka manzar hoga
phir koi pa na sakega KHabar-e-parwana

Shahzad Ahmad

---

---

shauq-e-safar be-sabab aur safar be-talab
us ki taraf chal diye jis ne pukara na tha

Shahzad Ahmad

---

---

shumar main na karunga firaq ke shab o roz
wahin se baat chalegi jahan se TuTi thi

Shahzad Ahmad

---

---

sine mein be-qarar hain murda mohabbaten
mumkin hai ye charag kabhi KHud hi jal paDe

Shahzad Ahmad

---

---

sitare is qadar dekhe ki aankhen bujh gain apni
mohabbat is qadar kar li mohabbat chhoD di hum ne

Shahzad Ahmad

---

---

supurdagi ka wo lamha kabhi nahin guzra
hazar bar mare hum hazar bar jiye

Shahzad Ahmad

---

---